(1893-1957) Un conseyu

link

Zagales de Robellada,
pastorinos de mio puelu,
los que curiaís la reciella
allí pel valle Estremeru;
los qu'al llau de Peñasanta
vivís xuntos col robecu,
y, por estar cerca d'ellí
se vos marcha'l santu al cielu,
non brindando cuando llega
a la vera'l forasteru;
a prepósitu del casu,
vos quiero dar un conseyu
pues según dicime acaba,
un vecín de Talaveru
que, por mis señas dirévos
qu'emberengó n'Arnaedu,
hasta la güestra mayada,
en el pasadu xunetu,
llegó una tarde cansiu,
descalteníu, sedientu;
” y non huestes pa brindalu
con migaya d'alimentu!
Yo bien sé que non tenés
roñosu temperamentu,
y que si non lu brindastes,
sin duda que hue por miedu
a que l'home dispreciase
güestro condumio modestu,
polo cual vengo a dicevos,
pa que vos sirva d'exemplu,
que todos los que subiemos
cuando rapaces, per Fresñu,
con el zurrón tras del llombu,
corizas, palu y mantiellu,
por mucho que la corramos,
del uno al otru hemisferiu,
y prebemos llambionadas
hechas con gustu y esmeru,
cuando golvemos a ésa,
non dispreciamos el quesu,
nin los platos de cuayada,
nin la borona, ni'l sueru,
nin la mantega ni'l pote
de castañas en inviernu.
Esto decivos quería,
pastorinos de mio pueblu,
los que curiaes la reciella,
alli pel valle Estremeru.